مجرم ونصاب بس بدماغ شيطان
جرايمه موقفتش ع القتل والنصب لا دا كمان انتحل شخصيات ناس تانية
منهم شخصية صاحبه الي قتله بأيده ودفنه ف بيته واخد فلوسه وممتلكاته عشان يواصل بعدها سلسلة جرايمه
موضعنا الناهرده عن القصه الحقيقيه لسفاح الجيزة وايه هي حكايته بالظبط ؟
.
الكل دلوقتي ابتدي يتابع او حتي سمع عن مسلسل سفاح الجيزه بطولة الفنان احمد فهمي
وللاسف هي حكاية حقيقية بدأت احداثها في ٢٠١٥ في منطقة بولاق الدكرور بالجيزة
اسمه الحقيقي قذافي فرّاج عبد العاطي عمره ٤٩ سنة اتخرج من كلية الحقوق واشتغل في التجارة،
قتل اربع اشخاص كان بيدفنهم كلهم بنفس الطريقة يحطهم جوا ديب فريزر لحد ما يحفر حفرة جوا شقته ويحط الجثة واقفة ويرمي عليها التراب ويكمل حياته عادي جدا كأن محصلش حاجة
اول جرايمه بدأت لما قرر يقتل صديق عمره رضا محمد عبد اللطيف سنة ٢٠١٥
صداقتهم القوية من الطفولة ممنعتوش من ارتكاب جريمته
رضا كان بيشتغل مهندس ف السعودية لمدة عشرين سنة كان وقتها بيبعت فلوسه لصاحبه اللي المفروض انه اكتر شخص هو بيثق فيه
وكان القذافي بيفهموا انه بيستثمرله الفلوس دي بعد ماأقنعه طبعا انه يعمله توكيل والحقيقة كانت غير كدا وانه الفلوس كان بيستثمرها فعلا بس لنفسه
لحد ماقرر رضا في يوم انه ينزل مصر وقتها القذافي حس أنه لعبته هتتكشف
استقبل صاحبه ف المطار واستدرجه لشقته الي في منطقة بولاق الدكرور بحجة انهم هيتغدوا سوا وحطله سم ف الاكل وفضل يضرب فيه لحد مامات ودفنه ف شقته وبعدها رجع الشقة لوضعها الطبيعي .
وبعد فترة قرر انه ينتحل شخصية رضا محمد عبد اللطيف وبالتالي يستولى ع كله فلوسه وممتلكاته
مع الوقت بقى القتل هو الطريقة الي بيحل بها مشاكله
وبعد مدة قرر يقتل زوجته فاطمة زكريا بعد مشاكل بينهم كان اهمها انها استولت ع ٤٠٠ الف جنيه من فلوسه
ولما رفضت ترجعهم قرر يقتلها ضرب راسها ف الحيطة لحد ماجالها نزيف وماتت
ف ساعتها نقلها وقتها حسب ع اعترافاته داخل ديب فريزر ف الشقة لحد مادفنها داخل حفرة بنفس الطريقة وفي نفس المكان الي دفن فيه صاحبه رضا.
ضحيته التالتة كانت نادين السيد الجهادي الي كانت بتشتغل في مكتبة كان بيملكها رضا والي بقت بتاعته
اتعرف عليها ونشا بينهم علاقة عاطفية وبعد ما وعدها انه هيتجوزها
اتفاجئت انه بيتقدم علشان يخطب اختها فاطمة الزهراء وقتها نادين هددته انها هتفضحه قدام اهلها
وقرر كعادته انه يتخلص من مشكلته بقتلها بعد مااستدرجها لإحدى الشقق الي بيمتلكها في بولاق وخنقها لحد ماماتت ودفنها بنفس الطريقة الي بيتبعها كل مرة .
وقدر يقنع اهلها انها سافرت برفقة مخرج سينمائي برا مصر علشان تشتغل موديل اعلانات ودا حسب شهادة والدتها الي ادلت بيها قدام المحكمة.
بعد فترة سافر القذافي لمدينة الاسكندرية بعد ماانتحل شخصية رضا وهناك تزوج من دكتورة صيدلانية اسمها نهى
المجني عليها الاخيرة اسمها ياسمين نصر ابراهيم اتقتلت علي ايد السفاح عام ٢٠١٧ بعد مااكتشفت انه نصب عليها بالاشتراك مع خطيبها
الي اتفق معاه على بيع شقة تملكها الضحية وقسمو المبلغ يينهم من غير مايدوها فلوسها
لما اكتشفت الضحية عملية النصب واجهته وهددته انها هتقدم بلاغ ضده لو مرجعلهاش فلوسها وقتها قرر يستدرجها لمخزن بمنطقة العصافرة وهناك خنقها لحد ماماتت
بداية نهاية سفاح الجيزة. كانت لما راح محل جواهرجي علشان يبيع دهب سرقه من زوجته الصيدلانية نهى ،
الصايغ شك فيه خصوصا انه ماكنش فيه فواتير وكمية الدهب كانت كبيرة الصايغ بلغ عنه بالفعل اتقبض عليه ولكن بإسم رضا ودي الغلطة الي كشفت كل جرايمه
لان في نفس الوقت دا اسرة رضا كانت بتدور عليه لما عرفو عن طريق محامي ان في حكم قضائي صدر ضده راحو يقابلوه في سجن الاستئناف بالاسكندرية
وقتها اتفاجئوا ان الشخص المحبوس هو القذافي صديقه وقدموا وقتها بلاغ للنائب العام علشان يحققوا في الواقعة ولما واجهوا بالمعلومات الي جمعتها الشرطة اعترف في النهاية بكل جرايمه
اتحكم عليه بالاعدام ٣ مرات كان كل مرة بيطعن في الحكم لحد يوم ٢١ مارس ٢٠٢٢ صدر الحكم الرابع بإعدام المتهم علشان يتكتب اخر سطر في قصة سفاح الجيزة
وهنا نكون وصلنا لنهاية القصة
مع السلامة